Барча йўналишлардаги «Афросиёб» поездлари йўловчилари учун Wi-Fi хизмати йўлга қўйилди. Бу ҳақда Транспорт вазирлиги матбуот хизмати хабар берди.
Билдирилишича, энди дастлабки 30 дақиқа бепул уланиш имкониайти мавжуд бўлиб, йўловчилар ички медиа порталдан фойдаланиб, фильмлар томоша қилиши ва мусиқа тинглаши мумкин.
Транспорт вазирлиги маълумотларига кўра, тармоқ аллақачон барча вагонларда ва «Афросиёб» поездларининг барча йўналишларида ишга туширилган. Тармоққа уланиш учун телефон рақами орқали рўйхатдан ўтиш лозим.
Интернетдан бепул 30 дақиқадан ортиқ фойдаланиш тарифлари қуйидагича:
48 соат — 15 минг сўм;
7 кун — 25 минг сўм;
30 кун — 50 минг сўм.
Сафар давомида Wi-Fi тармоғига уланиш бўйича саволларингиз бўлса, вагон кузатувчисига мурожаат қилишингиз мумкин.
«Ўзбектелеком» давлат провайдери 14 июль куни Wi-Fi хизмати ишга туширилганини маълум қилди. Рақамли технологиялар вазири Шерзод Шерматов 19 август куни ўзининг Telegram каналида Бухорога сафари чоғида Wi-Fi сифатини текширишга қарор қилгани ҳақида гапириб, кўпчилик ҳали ҳам хизмат ишга туширилганидан бехабар эканлигига эътибор қаратди.
«Транспорт вазирлигига поездлар ичига қўшимча ускуна қўйишга тегишли рухсатларни олишга ёрдам беришгани учун миннатдорчилик билдирамиз ва келгусида харид қилинадиган янги поездлар бошидан ичидаги тегишли телекоммуникация ускуналари билан олинади деб умид қиламиз. Тез ҳаракатланадиган ва металл кўп ишлатилган вагонларда ташқаридаги алоқа сигналлари абонентларга етиб боришида муаммо бўлади, шунинг учун уларнинг ичида тегишли қурилма ўрнатилиши шарт», — деб ёзади Шерзод Шерматов.
