Ижтимоий тармоқларда Мозори Шариф шаҳрида буюк мутафаккир Алишер Навоий ҳайкалининг бузиб ташлангани жамоатчилик эътиборини тортди.
Ҳодиса юзасидан Ўзбекистон Ташқи ишлар вазирлиги зудлик билан Афғонистон ҳукумати вакиллари билан боғланиб, расмий изоҳ олди.
Афғонистон томони берган маълумотга кўра, ҳайкал ўрнатилган жой аллома хотирасига муносиб эмас деб топилган ва янги, кўркам ёдгорлик мажмуаси қурилиши режалаштирилаётгани боис ҳайкал маҳаллий ҳокимият томонидан олиб ташланган.
Шу билан бирга, бузиш ишлари Афғонистон Маданият ва ахборот вазирлиги ҳамда жамоатчилик билан келишилмагани таъкидланган ва ушбу ҳолат юзасидан афғон тарафдан таассуф билдирилди.
Афғонистон ҳукумати Алишер Навоий номини абадийлаштириш бўйича аниқ чоралар кўришга ваъда берди.
Жумладан, янги ёдгорлик барпо этилиши, атрофи ободонлаштирилиши, шоир ижодига оид маълумотлар тикланиши ва мажмуа жойлашадиган майдонга Алишер Навоий номи берилиши режалаштирилган.
Афғонистон томони буюк мутафаккир хотирасини муносиб сақлашга қатъий содиқлигини билдирган.
