Аргентина терма жамоаси сардори Лионель Месси 4 сентябрь куни Венесуэлага қарши ўтказиладиган ЖЧ–2026 саралаш учрашуви ватандаги сўнгги расмий ўйини бўлиши мумкинлигини айтди. У ушбу баҳсни “жуда-жуда махсус” деб атади.
“Оилам — хотиним, фарзандларим, ота-онам ва опа-укаларим мен билан бирга бўлади. Бу сўнгги саралаш ўйини. Венесуэладан кейин нима бўлишини билмайман”, — дейди 38 ёшли футболчи.
2026 йилги ЖЧда қатнашиши кутилган Месси 2030 йилги саралаш бошлангунига қадар 40 ёшга тўлади.
АФА (Аргентина футбол ассоциацияси) Венесуэлага қарши ўйин учун чипталар нархини 100–500 доллар оралиғида белгилади. Бу эса мухлислар орасида улкан талаб пайдо бўлишига сабаб бўлмоқда.
Месси расман фаолиятини якунлаганини эълон қилмаган бўлса-да, ушбу баёнот унинг халқаро футболи якунланаётганидан дарак бермоқда.
Аргентиналиклар учун кеча, 4 сентябрдаги учрашув ўз қаҳрамонини хонадонда кузатиб қўйиш имконияти бўлиши мумкин.
