Андижон вилояти Бўстон тумани ҳокимининг икки нафар ўринбосари фермер хўжалигидан сохта экспорт операцияси орқали 65 млн сўм пора талаб қилгани аниқланди. Уларнинг бири 25 млн сўмни олган, иккинчиси эса қолган қисмини қабул қилаётганда ушланган.
Тошкент шаҳрида эса Сергели туманида ер майдони мақсадини ўзгартириш ва кўп қаватли уй қуриш учун 900 минг доллар талаб қилинган. Шахслардан бири олдиндан 220 минг долларни олган вақтда қўлга олинди.
Қашқадарё вилоятида “Ватанпарвар” ташкилоти вилоят кенгаши раиси ўринбосари 20 млн сўм пора билан ушланди. У айримлардан ҳайдовчилик гувоҳномасини имтиҳонсиз олиб беришни ваъда қилган.
Барча ҳолатлар бўйича жиноят иши қўзғатилиб, айбдорларга нисбатан “қамоқ” эҳтиёт чораси қўлланди. Тергов ҳаракатлари давом этмоқда.
