Ўзбекистонда ҳарбий ва идоравий формаларга ўхшаш кийим кийганлар жазоланиши мумкин
Ўзбекистонда ҳарбий ёки идоралар формасига ўхшаш кийим-бош жорий этиб, фойдаланганлик учун жавобгарлик белгиланяпти. Янги норма Норматив-ҳуқуқий ҳужжатлар лойиҳалари муҳокамаси порталига жойланган қонун лойиҳасига киритилган.
Бош прокуратура айрим тоифадаги давлат хизматчилари формасини қонунга хилоф равишда кийиб юриш ҳолатларининг олдини олишга қаратилган нормалар ишлаб чиқди. Янги нормалар Маъмурий жавобгарлик тўғрисидаги кодекснинг 2091-моддасига ўзгартириш ва қўшимча киритиш орқали жорий этилиши кутилмоқда.
Моддага киритилаётган ўзгартиришга кўра, вазирлик, идора ва ташкилот ҳарбий хизматчилари ёки ходимлари формасини, фарқловчи белгилари ва рамзлари бор кийим-бошини кийиш ҳуқуқи йўқ шахслар кийиши жаримага сабаб бўлади. Яъни бундай қонунбузарликка йўл қўйганлардан формали кийим-бош мусодара қилиниб, БҲМнинг икки бараваридан беш бараваригача миқдорда жарима қўлланади.
Жамоатчилик муҳокамасига қўйилган қонун лойиҳасидаги мазкур моддага қўшимча норма киритилмоқда.
Нормада белгиланишича, мато ранги, тикилиш услуби, фарқловчи белгилари ва бошқа предметлари ҳарбий ёки идоравий формали кийим-бош предметларини такрорловчи, унга ўхшаш кийим-бошни жорий этиш ёки улардан фойдаланиш ҳам жаримага сабаб бўлади. Бундай хатти-ҳаракат учун кийим-бош мусодара этилиб, БҲМнинг беш бараваридан ўн бараваригача миқдорда жарима солинади.
