Бугун, 4 июнь куни Ўзбекистон Республикаси Президенти Шавкат Мирзиёев Қирғиз Республикаси Президенти Садир Жапаров билан телефон орқали мулоқот қилди.
Суҳбат аввалида давлат раҳбари Садир Жапаров ва қардош қирғиз халқини Қирғизистоннинг 2027–2028 йилларда БМТ Хавфсизлик Кенгашининг доимий бўлмаган аъзоси этиб сайлангани муносабати билан самимий муборакбод этди.
Шавкат Мирзиёев мазкур натижа Қирғизистоннинг фаол ташқи сиёсати, шунингдек, минтақавий барқарорлик ва хавфсизликни таъминлаш борасидаги саъй-ҳаракатлари халқаро ҳамжамият томонидан юксак баҳоланаётганининг ёрқин ифодаси эканини таъкидлади.
Томонлар халқаро майдонда яқин мувофиқлаштирув ва ўзаро қўллаб-қувватлашни давом эттиришга тайёр эканликларини тасдиқлади.
Суҳбат давомида Ўзбекистон ва Қирғизистон ўртасидаги дўстлик, яхши қўшничилик ҳамда стратегик шериклик муносабатлари кейинги йилларда янги босқичга кўтарилгани мамнуният билан қайд этилди.
Шунингдек, олий даражада эришилган келишувларнинг амалий ижроси, хусусан, иқтисодиёт, транспорт, энергетика ва маданий-гуманитар соҳалардаги ҳамкорликни янада кенгайтириш масалалари муҳокама қилинди.
Президентлар бўлажак олий ва юқори даражадаги тадбирлар режаси юзасидан ҳам фикр алмашди.
