Тошкент шаҳрида пулли тўхташ жойлари ташкил этилган кўчалардаги кўп қаватли уйларда истиқомат қилувчи аҳоли учун махсус имтиёзлар яратилади. Бу ҳақда пойтахт ҳокимлигининг Матбуот хизмати хабар берди.
Билдирилишича, аҳоли учун резидентлик рухсатномалари жорий этилиб, рухсатнома эгалари ўз маҳалласи ҳудудидаги тўхташ жойларидан сутканинг кечки пайтидан тонггача имтиёзли шартларда фойдаланиш имконига эга бўлади.
Шунингдек, кундузги вақтда ҳам муайян чегирмалар берилади, байрам ва дам олиш кунларида эса янада кенгроқ имтиёзлар тақдим этилади.
Ҳозирги кунда резидентлик рухсатномаларини электрон тартибда олиш учун Ягона интерактив давлат хизматлари портали билан интеграция ишлари олиб борилмоқда. Жараёнлар жорий йилнинг ноябрь ойига қадар якунланиши режалаштирилган.
Бундан сўнг, Тошкент шаҳар ҳокимининг тегишли қарори қабул қилиниб, рухсатнома бериш тартиби, амал қилиш муддати, ҳуқуққа эга бўлувчи фуқаролар тоифаси, тақдим этиладиган имтиёзлар рўйхати аниқ белгиланади.
