Қирғизистонда парламентга шифокорлар ва ўқитувчиларга ҳужум қилганлик учун жиноий жавобгарликни жорий этиш таклиф қилинди. Бу ҳақда АКИпресс хабар берди.
Бугун, 11 сентябр куни парламент йиғилишида мамлакатнинг Соғлиқни сақлаш вазири Эркин Чечейбаев “Жиноят кодексига ўзгартишлар киритиш тўғрисида”ги қонун лойиҳасини тақдим этган.
Билдирилишича, ходимга ўз хизмат вазифаларини бажариш вақтида ҳужум қилганлик учун жазо жорий этиш таклиф қилинмоқда. Лойиҳа соғлиқни сақлаш, таълим ва давлат хизматлари кўрсатиладиган бошқа соҳаларда ишлайдиган ходимларнинг хавфсизлиги ва қадр-қимматини сақлашга қаратилган.
“Сўнгги пайтларда тиббиёт ходимларига нисбатан ҳужум ва тажовуз ҳолатлари тез-тез учрамоқда. Бу муаммонинг жиддийлигини кўрсатади. Жиноят кодексида бундай жиноятлар учун жавобгарлик белгиланмаган. Шу боис, бу ўзгаришларга эҳтиёж бор эди”,— дейди вазир.
Қонун кучга кирса, ўқитувчи ва шифокорларга куч ишлатганлар катта миқдорда жарима тўлашдан ташқари 3 йилдан 5 йилгача озодликдан маҳрум қилиниши ҳам мумкин.
