Полша авиация навигацияси хизмати (ПАНСА) хабарга кўра, мамлакат шарқида — Беларус ва Украина билан чегарадош ҳудудда сентябрь вақтинча чекланган. Қарор 2025 йил 10 сентябрдан кучга кириб, 9 декабргача амал қилади. Бу ҳақда Zamon.uz хабар берди.
PANSA баёнотида айтилишича, чекловлар давлат хавфсизлигини таъминлаш мақсадида жорий қилинган. Ушбу ҳудудда фуқаролик дронлари кун-у тун парвоз қила олмайди. Тунда фақат ҳарбий самолётларга, кундузи эса Полша ҳукуматини олдиндан огоҳлантирган ҳаво кемаларига рухсат этилади. Фавқулодда вазиятлар, табиий офатлар ёки шошилинч тиббий ёрдам учун учадиган самолётлар бу тартибдан мустасно.
Шунингдек, ҳукумат ва тиббий авиация парвозлари, экологик хавф ёки табиий офат оқибатларини бартараф этишга қаратилган миссиялар ҳам рухсат этилиши мумкин. ПАНСА қайд этишича, белгиланган ҳудудга рухсатсиз кириш авиация қонунчилигини бузиш ҳисобланади.
Мазкур қарор Россия ва Беларуснинг қўшма “Запад-2025” ҳарбий машғулотлари фонида қабул қилинган. 10 сентябрь куни эса Россиянинг Украинага қилган дрон ҳужуми оқибатида илк бор Полша ҳудуди ҳам зарарланган, камида 19 дрон мамлакат ҳаво ҳудудига киргани ва улардан тўрт нафари уриб туширилгани хабар қилинганди. Шу сабабли Варшава, Люблин ва Жашув аэропортлари вақтинча фаолиятини тўхтатишга мажбур бўлди.
