Кеча, 15 сентябрь куни машҳур кино ва телевидение оператори, режиссёр Батир Жолдасович Базарбоев 70 ёшида оламдан ўтди. Бу ҳақда унинг қизи Шаҳноза Жолдасова ижтимоий тармоқдаги саҳифасида хабар қолдирди.
Марҳум узоқ йиллар давомида Ўзбекистон ва Россия кино соҳасида фаолият юритган, кўплаб ҳужжатли ва илмий-оммабоп фильмлар муаллифи сифатида танилган эди. У “Денгиз сув сўрайди”, “Орол қизлари”, “Аждар йили” каби фильмлар орқали томошабинлар қалбидан жой олган.
Батир Базарбоев нафақат санъат соҳаси вакили, балки илмий соҳада ҳам фаол бўлиб, Тошкент ахборот технологиялари университети профессори сифатида минглаб шогирдларга сабоқ берган.
Эслатиб ўтамиз, марҳум Россия кинематографлар уюшмаси ва кинооператорлар гильдияси аъзоси ҳам эди.
