Тожикистондан олиб келинган 66 кг наркотик моддалар тўхтатиб қолинди. Бу ҳақда ДХХ Darakchi.uzга хабар берди.
Маълум қилинишича, Фарғона вилояти Бешариқ туманида яшовчи фуқаро бошқарувидаги “Cобалт” русумли автотранспорт воситаси Тожикистон Республикасидан Бешариқ туманида жойлашган “Ровот” чегара божхона постига кириб келган вақтида тўхтатилган.
Автомашина синчковлик билан кўздан кечирилганда, унинг юкхонасига ўрнатилган газ баллони ичига 53 дона ўрамда гиёҳвандлик воситалари яширилганлиги маълум бўлган. Ушбу ўрамларда 50 кг 852 гр “опий” ва 6 кг 927 гр “гашиш” моддалари борлиги аниқланган.
Ҳудди шундай, Самарқанд вилоятида Ургут туманида яшовчи шахс бошқарувидаги “Гентра” русумли автомашина “Самарқанд-Навоий” йўналишида ҳаракатланиб кетаётган вақтида автотранспорт воситаси холислар иштирокида кўздан кечирилганда, унинг юкхонасида Тожикистон Республикасидан олиб келинган 981 гр “героин” моддаси борлиги маълум бўлган.
Яна бир ҳолат, “Андижон – Наманган” йўналишида ҳаракатланаётган “ВАЗ 2106” русумли ака-ука кетаётган автомашина салонидан 1 кг 833 гр “гашиш” моддаси ашёвий далил сифатида олинган.
Терговга қадар текширув давомида, ушбу ажал оғуси келгусида сотиб, мўмай даромад топиш мақсадида Тожикистон Республикасидан контрабанда йўли билан олиб келинганлиги маълум бўлган.
Навбатдаги ҳолатда эса Қирғиз Республикасининг Ўш шаҳрида яшовчи фуқаро 3 кг 949 гр “гашиш” моддасини Андижон шаҳрида “шартли” харидорга 28 минг АҚШ долларига сотган вақтида қўлга олинган.
Аниқланишича, қирғизистонлик фуқаро ушбу ажал оғусини муқаддам тожикистонлик наркокуръерлар томонидан қолдириб кетилган Тошкент вилоятининг Оҳангарон тумани ҳудудидаги хуфия жойдан олган.
Ҳозирда мазкур шахсларнинг барчасига нисбатан Жиноят Кодексининг 246 ва 273-моддалари билан жиноят ишлари қўзғатилиб, “қамоқ” эҳтиёт чораси қўлланилган.
