Ғарбий Бенгал штатининг Даржилинг шаҳрида ёғингарчилик сабабли кўчкилар юзага келиб, асосий йўллар вайрон бўлди. Қурбонлар орасида аёллар ва болалар ҳам бор.
“Тhe Hindu” нашрининг ёзишича, 4–5 октябрь кунлари Ҳиндистоннинг шимоли-шарқий ҳудудларида кузатилган кучли ёмғир камида 24 кишининг ҳаётига зомин бўлган. Кўчкилар туфайли минглаб сайёҳлар баланд тоғли ҳудудларда қамалиб қолган, баъзи фуқаролар бедарак йўқолган.
Ҳиндистон бош вазири Нарендра Моди воқеадан чуқур қайғуда эканини билдириб, жабрланганларга ёрдам кўрсатишга тайёрлигини айтди. Шунингдек, аҳолига эҳтиёт бўлиш тавсия этилди.
Об-ҳаво хизмати ёмғирлар 7 октябрга қадар давом этишини билдирган. Расмийлар сув тошқинлари хавфи юқорилигини таъкидлашмоқда.
