Солиқ қўмитаси тадбиркорларни норасмий субъектлар билан ҳамкорлик қилишдан огоҳлантирди.
Қўмита сайтида норасмий иқтисодий фаолият юритиб, шубҳали операцияларни амалга оширган 7 522 та субъект рўйхати эълон қилди. Бу орқали бизнесменлар ҳамкорининг қанчалик ишончли эканини текшириб олиши мумкин.
Қайд этилишича, 2025 йилнинг ўзида фаолиятида шубҳали ҳолатлар ва нақдлаштириш кузатилган 902 та “тадбиркор” аниқланган.
Контрагентларнинг ишончлилигини аниқлашда молиявий ҳисоботларни, Солиқ қўмитасининг расмий веб-саҳифасида реестрда борлигини, офис ва омборларнинг мавжудлигини, ҳамкорнинг ижтимоий тармоқда борлиги ва бошқа мавжуд маълумотларни текшириш тавсия этилди.
Таъкидланишича, тадбиркорнинг ҳамкорида норасмий иқтисодий фаолият юритганлик ҳолатлари аниқланса, солиқ органлари айрим операцияларни эътиборга олмасликка ҳамда тўланиши лозим бўлган солиқлар суммаларини ўзгартиришга ҳақли.
Бундай субъектлар билан ҳамкорлик қилиш солиқ тўлашдан бўйин товлаш сифатида ҳам қаралиши мумкин.
