Мадагаскар президенти Андри Ражоэлина 12 октябрь куни ёшлар бошчилигидаги оммавий норозиликлар ва армиянинг бир қисмини намойишчилар тарафига ўтиши ортидан мамлакатни тарк этди. Бу ҳақда мухолифат раҳбарлари ва расмий манбалар Reaturs’га маълум қилган.
Мухолифат етакчиси Ситени Рандрианасолониако парламентдаги чиқишида Ражоэлина Францияга тегишли ҳарбий самолёт орқали мамлакатдан олиб чиқилганини айтди. Ҳарбий манбага кўра, у Цент-Мари аэропортидан вертолёт орқали олиб кетилиб, Casa самолётига ўтказилган.
Президент халққа йўллаган видеомурожаатида ўз ҳаётига хавф туғилгани сабабли хавфсиз жойга кетишга мажбур бўлганини билдирган. У қаэрдалигини ошкор қилмаган бўлса-да, “Мадагаскарни вайрон қилишга йўл қўймаслигини” таъкидлаган. Дипломатик манбалар унинг истеъфо беришни рад этганини билдирган.
Франция президенти Эммануэл Макрон эса Ражоэлинага қочишда ёрдам бергани ҳақидаги даъволарни ҳозирча тасдиқламади, аммо Мадагаскарда конституциявий тартиб сақланиши зарурлигини қайд этди.
“З авлод” норозиликлари ва тартибсизликлар
Сентябрь охиридан бошлаб Мадагаскарда “З авлоди” номи билан танилган ёшлар ҳукуматга қарши оммавий намойишлар бошлади. Дастлаб сув ва электр таъминотидаги муаммоларга норозилик билдирган намойишчилар кейинчалик президент, парламент ва сайлов комиссиясининг истеъфосини талаб қилишди.
Тартибсизликлар натижасида бир нечта давлат идоралари, савдо марказлари ва банклар вайрон қилинди. Полиция кўздан ёш оқизувчи газ ва резина ўқлар билан жавоб берди. БМТ маълумотларига кўра, илк тўрт кун ичида камида 22 киши ҳалок бўлган, 100 дан ортиғи жароҳатланган.
Ҳозирча мамлакатда вазият беқарорлигича қолмоқда. Ражоэлина расман истеъфо бермаган бўлса-да, унинг тақдири ва сиёсий келажаги номаълумлигича қолмоқда.
