Ўзбекистон жамоалари ўз тарихида илк бор Жаҳон чемпионати саралаш босқичи ва турнирнинг финал босқичида иштирок этган футболчилари учун ФИФАъдан компенсация олади. ФИФА 2026 йилги Жаҳон чемпионати учун 355 миллион АҚШ доллар компенсация қилишни режалаштирган. Бу ҳақда Ўзбекистон профессионал футбол лигаси (ЎзПФЛ) хабар берди.
Билдирилишича, ушбу тажриба 2010 йилги мундиалдан бошлаган. Ўша йилги компенсация пуллари 40 миллион АҚШ долларини ташкил этган бўлса, Қатарда ўтказилган мундиалда бу нарх 209 миллион АҚШ доллари миқдорига етди. Қатарда ўтган Жаҳон чемпионати гуруҳ босқичида иштирокини якунлаган терма жамоаларга энг камида 14 кун давомида унда иштирок этган ҳисобланиб, мусобақанинг ҳар бир куни учун бир нафар футболчига 10 950 АҚШ долларидан компенсация тўланган.
ФИФА 2026 йилги Жаҳон чемпионатидан эътиборан ушбу дастурда бир қатор тамойилларни ўзгартирмоқда. Аввало, бу галги мусобақа учун ажратилган компенсация пулларининг умумий миқдори рекорд даража 355 миллион АҚШ долларига етди. Ушбу сумманинг 100 миллион АҚШ долларига тенг қисми эса мусобақанинг қитъавий саралаш босқичларида иштирок этиш учун ўз футболчиларини терма жамоалар ихтиёрига юборган клублар ўртасида тақсимланиши белгиланди. Бунинг учун, футболчи Жаҳон чемпионати саралаш босқичи доирасидаги расмий учрашувда ўйин қайдномасига киритилган бўлиши талаб этилади. Бунда, футболчи терма жамоаси билан мундиал йўлланмасини олган ёки олмагани аҳамият касб этмайди. Шунингдек, аввалги тамойиллар бўйича футболчи учун компенсация олишга у сўнгги икки мавсум давомида рўйхатдан ўтказилган клубгина ҳақли ҳисобланган бўлса, эндиликда ўз таркибидаги футболчини Жаҳон чемпионати ва унинг саралаш босқичлари учун терма жамоа ихтиёрига юборган исталган клуб дастур доирасидаги пулларни қабул қилиб олиши мумкин.
Ўзбекистон миллий терма жамоасининг Жаҳон чемпионатига йўлланма олиши натижасида ўзбек клублари футболчиларини Жаҳон чемпионати ва унинг саралаш босқичлари доирасидаги ўйинларга юборгани учун ФИФА дастуридан компенсация пуллари олади. Мисол учун, саралашнинг сўнгги икки босқичи доирасида Абдувоҳид Неъматов 15 маротаба, Шерзод Насруллаев 12 марта, Акмал Мозговой 10 марта, Зафармурод Абдураҳматов 4 маротаба, Ғолиб Ғайбуллаев 2 бор ва Алибек Давронов бир марта Ўзбекистон терма жамоасининг ўйин қайдномасига киритилди. Ушбу футболчилар барча учрашувларга “Насаф” футболчиси сифатида жалб этилган. Бундан ташқари, Умар Эшмуродов умумий 13 та учрашувнинг 4 тасида, Бобур Абдухолиқов умумий 11 ўйиннинг 8 тасида “Насаф” футболчиси бўлган. Демак, Қарши клуби ушбу футболчиларнинг ҳар бир учрашуви учун маълум миқдорда компенсация пулларини ишлаб топади.
Саралаш босқичи учун ажратилган 100 миллион АҚШ доллари дунё бўйлаб жами минглаб клублар ўртасида тақсимланади. Қолган пуллар эса Жаҳон чемпионатида иштирок этган футболчиларнинг клубларига берилади.
