Туркия футбол федерацияси (ТФФ) мамлакатда давом этаётган пул тикиш бўйича тергов доирасида гумонланаётган “Галатасарай” ҳимоячиси Эрен Элмалини миллий терма жамоа таркибидан чиқариб ташлаганини маълум қилди. Бу ҳақда “Turkiye Today” нашри хабар берди.
ТФФ баёнотига кўра, 1024 нафар футболчи Интизом кодексининг 57-моддаси асосида эҳтиёт чораси сифатида Профессионал футбол интизом кенгашига юборилган. Федерация профессионал лигаларда ўйинчиларнинг ноқонуний гаров фаолияти билан боғлиқ далиллар аниқланганини маълум қилди.
Элмалидан ташқари, Иззет Челик (U-21) ва Эге Албайрак (U-19) ҳам ўз терма жамоалари таркибидан вақтинча четлатилган.
24 ёшли Эрен Элмали ижтимоий тармоқлар орқали берган баёнотида терговга тортилганини тасдиқлади. Унинг айтишича, воқеа “тахминан беш йил аввалги” бир ўйинга қўйилган битта гаров билан боғлиқ:
“Менинг исмим жамоам билан боғлиқ бўлмаган бир учрашувга тикланган битта гаров туфайли тилга олинган. Ўшандан бери мен пул тикиш фаолияти билан мутлақо шуғулланмаганман”, — деди футболчи.
Тергов ТФФ томонидан футболчилар ўртасидаги ноқонуний пул тикиш амалиётига қарши олиб борилаётган кенг қамровли кампаниянинг бир қисми ҳисобланади. Расмийлар ҳозирча иш тафсилотларини тўлиқ ошкор этмаган, лекин суриштирув турк футболи тарихидаги энг йирик интизомий ишлардан бири сифатида қайд этилмоқда.
Маълумот учун, Эрен Элмали Туркия терма жамоаси билан Жаҳон чемпионати саралашида 3 та учрашувда майдонга тушган.
