Ўзбекистонликлар Японияда қурилиш ишларига юборилиши кўзда тутилмоқда. Миграция агентлиги маълумотига кўра, бепул ўқув курсларини тамомлаган мутахассислар Японияда юқори маошли иш ўрни билан таъминланади.
Май ойида Япониянинг Proud Partners компанияси билан тузилган келишув доирасида ҳайдовчилар ва қурувчиларни япон тили ҳамда касбга ўқитиш белгиланган. Сентябрь ойида лойиҳанинг рамзий очилиши ўтказилди ва аллақачон 200 дан ортиқ ҳайдовчи учун танлов ўтди.
Қурилиш соҳаси бўйича рўйхатдан ўтган 700 нафар номзод 15 декабрдан онлайн танловда қатнашади. Танловдан ўтганлар Ангрендаги махсус тайёргарлик марказида 6–8 ойлик бепул ўқув курсларида таълим олади ва ётоқхона билан таъминланади. Ўқиш якунлангач, улар Японияда расман иш бошлайди.
Танлов натижалари 20 декабрга қадар эълон қилинади.
