Ижтимоий тармоқларда Паркент туманидаги иссиқхоналар фаолиятига оид тарқалган хабарлар юзасидан Экология ва иқлим ўзгариши миллий қўмитаси томонидан ўрганиш ишлари олиб борилди. Ҳолат Давлат экологик назорат инспекцияси ҳамда Тошкент вилояти Экология ва иқлим ўзгариши бош бошқармаси ходимлари томонидан жойига чиқиб текширилди.
Текширув давомида Паркент тумани Қайилма МФЙ ҳудудида жойлашган иссиқхонада мурожаатда келтирилган ҳолатлар тасдиқланди. Маълум бўлишича, иссиқхонанинг тўрт қозонхонасида фильтр ускуналари носоз ҳолатда ишлаган. Ишчи гуруҳ изоҳига кўра, ёғингарчилик сабаб кўмир урнасига сув тўлиб, кўмир чала ёнган ва натижада фильтрларнинг самарадорлиги етарли бўлмаган.
Аниқланган ҳолат юзасидан иссиқхона раҳбарига Маъмурий жавобгарлик тўғрисидаги кодекснинг 95-моддасига асосан маъмурий баённома расмийлаштирилди ва иссиқхона фаолияти вақтинча тўхтатилди. Шунингдек, Паркент туманидаги яна бир иссиқхонада ҳам фильтр носозлиги аниқланиб, корхона раҳбари жавобгарликка тортилди ҳамда камчиликларни зудлик билан бартараф этиш бўйича кўрсатмалар берилди.
