Тошкент метрополитени матбуот хизматининг маълум қилишича, 16 декабрь куни соат 16:23 да “Мустақиллик майдони” бекатидан “Пахтакор” томонга ҳаракатланиши керак бўлган 16-сонли поездда носозлик юзага келган. Йўловчилардан бири эшиклар ёпилаётган пайтда вагонга киришга уринган ва натижада эшикни ҳимоя қилувчи механизм ишдан чиққан.
Машинист носозликни бартараф этган бўлса-да, муаммо кейинги бекатга етмасдан яна такрорланган. Шундан сўнг йўриқномага мувофиқ, барча йўловчилар бекатга туширилган ва ҳаракат таркиби электродепога олиб кетилган.
“Тошкент метрополитени” ДУК йўловчиларни метро объектларида хавфсизлик қоидаларига қатъий риоя қилишга чақириб, эшикларни мажбуран очмаслик ва метро мулкига зарар етказмасликни сўради. Қоидаларга амал қилиш барча йўловчиларнинг хавфсизлиги ва қулайлигини таъминлаши таъкидланди.
