Ўзбекистонда болаларни зўравонликнинг барча шаклларидан ҳимоя қилиш бўйича 2026–2030 йилларга мўлжалланган Стратегия тасдиқланди. Ҳужжат Ижтимоий ҳимоя миллий агентлиги томонидан ишлаб чиқилган бўлиб, “Болаларни зўравонликнинг барча шаклларидан ҳимоя қилиш тўғрисида”ги Қонун ижросини тизимли таъминлашга қаратилган.
Стратегия доирасида болалар учун хавфсиз муҳит яратиш, зўравонлик хавфи остидаги болаларни эрта аниқлаш ва уларга комплекс ижтимоий, психологик ҳамда ҳуқуқий ёрдам кўрсатиш кўзда тутилган. Хусусан, 2026 йилдан профессионал тутинган оилалар билан ишлаш тизими йўлга қўйилиб, устувор эътибор оилани қўллаб-қувватлаш ва уни сақлаб қолишга қаратилади.
Шунингдек, болаларни жамиятга мослаштиришга хизмат қилувчи ижтимоий интеграция марказлари ташкил этилиши, бола ҳуқуқларини кучайтиришга қаратилган қонунчилик ўзгаришлари амалга оширилиши белгиланган. Стратегия болалар билан ишлашда идоралараро ҳамкорликни кучайтириш ва ягона электрон мониторинг тизимини жорий этишни ҳам назарда тутади.
