17 декабрь куни Англия Лига кубоги чорак финали доирасида “Манчестер Сити” ўз майдонида “Брентфорд”ни 2:0 ҳисобида мағлуб этди. Учрашувдан сўнг “шаҳарликлар”нинг 18 ёшли ҳужумчиси Дивайн Мукаса ўзбекистонлик ҳимоячи Абдуқодир Ҳусанов ҳақида илиқ фикрлар билдирди.
“Ҳусановни алдаб ўтиб кетиш жуда қийин. У ‘Брентфорд’ юзага келтирмоқчи бўлган барча хавфларни бартараф этди. Бу ишни жуда яхши уддалади, унга алоҳида раҳмат”, — деди Дивайн Мукаса.
Қайд этилишича, Мукаса ушбу учрашувда асосий таркибда майдонга тушиб, тўлиқ 90 дақиқа ҳаракат қилди. Абдуқодир Ҳусанов эса жорий йилнинг 26 ноябрь куни Чемпионлар лигасида “Байер Леверкузен”га қарши баҳсдан сўнг илк бор асосий таркибда ўйнади.
“Брентфорд”га қарши баҳсда Ҳусанов сариқ карточка олганига қарамай, ишончли ва фаол ўйин намойиш этди. Sofascore портали унинг ҳаракатларини 7,2 балл билан баҳолади.
