Халқаро бокс ассоциацияси (IBA) Дубайда бўлиб ўтган бокс бўйича жаҳон чемпионатининг 60 кг вазн тоифаси финалида Абду Малик Ҳалоков ва Всеволод Шумков ўртасида юзага келган баҳсли эпизод юзасидан расмий қарорини эълон қилди.
Мутахассислар таҳлилидан сўнг, мусобақа натижаси ўзгаришсиз қолдирилиши маълум қилинди.
IBA бош котиби ва бош директори Крис Робертсга кўра, эпизод реал вақт режимида баҳоланиб, техник делегат томонидан якуний қарор қабул қилинган. Видеотаҳлил Шумковнинг оғзи Ҳалоковнинг қулоғига тасодифан тегиб кетганини, ҳолат жангга таъсир кўрсатмаганини кўрсатган.
Қоидага зид алоқа бўлиши мумкин бўлса-да, ҳакамлар аралашувга ҳожат йўқлигини билдирган. Ўзбекистон делегацияси мусобақа давомида апелляция бермагани сабабли, натижани ўзгартириш учун ҳуқуқий асос топилмади.
Шу билан бирга, ҳолат шаффофликни таъминлаш мақсадида БИИУ томонидан қўшимча кўриб чиқилиши мумкин.
