Россия президенти Владимир Путин 25 декабрь куни бўлиб ўтган Давлат кенгаши йиғилишида Украина билан боғлиқ музокаралар ҳақида гапирар экан, ҳудудларни қисман “алмаштириш” варианти истисно этилмаслигини айтди. Бу ҳақда Россиянинг “Коммерсант” нашри хабар берди.
ОАВларга кўра, гап 2022 йилда Россия томонидан аннексия қилинган деб эълон қилинган Запороже ва Херсон вилоятларига тааллуқли талабларни юмшатиш ҳақида кетмоқда. Хусусан, Москва ушбу ҳудудлардан Украина қўшинларини тўлиқ олиб чиқиш шартини илгари сурмаслиги мумкин.
Шу билан бирга, Путин Донетск вилоятидаги Краматорск–Константиновка–Славянск ҳудудлари масаласи муҳокама қилинмаслигини алоҳида таъкидлаган.
Россия президенти, шунингдек, АҚШ билан Запороже атом электр станциясини қўшма бошқариш масаласи муҳокама қилинаётганини айтиб ўтди. Унинг сўзларига кўра, АҚШ томони станцияда майнинг билан шуғулланиш ҳамда Украинага электр энергияси етказиб бериш масалаларига қизиқиш билдирган.
26 декабрь куни Украина президенти Владимир Зеленский яқин вақт ичида АҚШ президенти Доналд Трамп билан учрашув бўлиб ўтишини маълум қилди. Украина ОАВларига кўра, ушбу учрашув 28 декабрь куниёқ ўтказилиши мумкин.
