НАТО Бош котиби Марк Рютте Германиянинг Bild газетасига берган интервьюсида Россия Президенти Владимир Путинни музокаралар столига фақат АҚШ Президенти Доналд Трамп мажбур қила олишини таъкидлади. Унинг сўзларига кўра, Трамп Украинадаги урушни якунлашга жиддий эътибор қаратган.
Рютте тинчлик келишувлари доимо муросаларни талаб қилишини қайд этар экан, қайси томон қандай ён бериши кераклиги ҳақида аниқ фикр билдирмади. Шу билан бирга, у Трамп президент бўлган тақдирда АҚШ Украинани қўллаб-қувватлашдан воз кечади деган хавотирлар асоссиз эканини, Вашингтон НАТОга содиқ қолишини айтди.
НАТО Бош котибининг таъкидлашича, урушни тўхтатиш қийин бўлаётганининг сабаби — Путин катта йўқотишларга қарамай жангларни давом эттиришга тайёр. НАТО ҳисоб-китобларига кўра, Россия Украинанинг 1 фоиздан кам ҳудудини эгаллаган бўлса-да, бунинг эвазига 1,1 миллионгача ҳарбий ҳалок бўлган ёки яраланган.
Рютте Украинага Ғарбнинг кучли хавфсизлик кафолатлари ҳал қилувчи аҳамиятга эга эканини айтиб, Путинни янги ҳужумдан тийиб турувчи уч омилни санаб ўтди: тайёр ҳолатдаги Украина армияси, Франция ва Буюк Британия бошчилигидаги “кўнгиллилар коалицияси” ҳамда АҚШнинг бевосита иштироки. Унинг фикрича, бу механизм аввалги “Минск” келишувларидан тубдан фарқ қилади ва анча мустаҳкам кафолатларни таъминлайди.
