Олий таълим, фан ва инновациялар вазирлиги хабарига кўра, давлат комиссиясининг тегишли баёнига асосан 2025/2026-ўқув йилида олий таълим ташкилотларига қабул қилинган талабалар учун шартнома тўловларини амалга ошириш ва талабалар сафига қабулни расмийлаштириш муддати 2026 йил 31 январь (шу куни ҳам) этиб белгиланди.
Қайд этилишича, қабул параметрлари доирасида ўқишга тавсия этилган абитуриентлар базавий тўлов-контракт шаклида бир йиллик ўқиш қийматининг камида 50 фоизини тўлаши лозим. Шунингдек, табақалаштирилган (супер) тўлов-контракт асосида ўқиш истагини билдирганлар ҳам белгиланган йиллик тўловнинг камида 50 фоизини амалга ошириши талаб этилади.
Маълумот учун, амалдаги тартибга мувофиқ, иккинчи ва ундан юқори босқич талабалари учун контракт тўловлари муддати олий таълим муассасаси раҳбари томонидан узайтирилиши мумкин.
