Ўзбекистон Ғазо секторидаги вазиятни чуқур ташвиш билан кузатмоқда ва уни инсонпарварлик фожиаси сифатида баҳоламоқда.
ТИВ маълумотларига кўра, Ўзбекистон ўт очишни тўхтатиш бўйича эришилган келишувларга тўлиқ амал қилинишини, гуманитар ёрдамнинг тўсқинликсиз етказилишини ва можарони “икки халқ – икки давлат” тамойили асосида сиёсий-дипломатик йўл билан ҳал этишни қўллаб-қувватлайди.
Шунингдек, Ўзбекистон жафокаш Фаластин халқига инсонпарварлик ёрдамини изчил давом эттирмоқда. Хусусан, 100 нафар фаластинлик бемор даволаниш учун Ўзбекистонга олиб келинган ва уларга ҳар томонлама ёрдам кўрсатиш мақсадида президент томонидан махсус фармон қабул қилинган.
Ташқи ишлар вазирлиги минтақада барқарор тинчлик ва хавфсизликни таъминлаш йўлидаги халқаро саъй-ҳаракатларни ҳам қўллаб-қувватлашда давом этади. Шу билан бирга, Россия ва Украина ўртасидаги зиддиятга Ўзбекистоннинг муносабати илгари эълон қилинганди.
