11 январдан 12 январга ўтар кечаси Саудия Арабистонида Испания Суперкубоги финал учрашуви бўлиб ўтди. Унда “Барселона” азалий рақиби “Реал Мадрид”ни 3:2 ҳисобида мағлуб этиб, бош совринни қўлга киритди.
Учрашувнинг 36-дақиқасида Рафинҳанинг аниқ зарбаси ҳисобни очди. Биринчи бўлим якунига яқин ўйин янада кескинлашди. 45+2-дақиқада Винисиус Жуниор жавоб голини уриб, мувозанатни тиклади. Орадан кўп ўтмай, 45+4-дақиқада Роберт Левандовский “Барселона”ни яна олдинга олиб чиқди. Бироқ қўшимча дақиқаларда “Реал” яна ҳисобни тенглаштирди — 45+6-дақиқада Гарсия гол муаллифига айланди.
Иккинчи бўлимнинг 76-дақиқасида Рафинҳанинг иккинчи голи “Барселона”га ғалабани тақдим этди. Учрашувга қўшиб берилган 90+1-дақиқада Френки де Ёнг қизил карточка олиб майдонни тарк этди. Шунга қарамай, ҳисоб ўзгармади ва баҳс “Барселона” фойдасига якунланди.
Шу тариқа, каталонияликлар Испания Суперкубогини кетма-кет иккинчи бор, умумий ҳисобда эса 16-марта қўлга киритди. Бу кўрсаткич бўйича “Реал Мадрид” 13 та соврин билан иккинчи ўринда бормоқда.
