Ўзбекистон Республикаси Президенти, Қуролли Кучлар Олий Бош Қўмондони Шавкат Мирзиёев Тошкент вилоятида жойлашган Махсус операциялар кучларининг янги полигонига ташриф буюрди. Мазкур полигон сўнгги йилларда Мудофаа вазирлиги тизимидаги дала ўқув майдонлари ва ҳарбий объектларни халқаро стандартлар асосида модернизация қилиш бўйича амалга оширилаётган ислоҳотларнинг мантиқий давоми бўлди.
Давлат раҳбари бу ерда жанговар ва махсус тайёргарлик машғулотларини ташкил этишнинг замонавий усуллари, қўшинлар ва қурол-яроғни бошқаришнинг рақамли тизимлари, шунингдек, учувчисиз учиш аппаратлари иштирокидаги амалий машқлар билан танишди. Машғулотларда турли қўшин турларининг ўзаро мувофиқлашган ҳаракатлари намойиш этилди.
Машғулотлар якунида Президент бўлинмаларнинг тайёргарлик даражаси ва биргаликдаги ҳаракатларидаги уйғунликни юқори баҳолаб, бугунги мураккаб хавфсизлик шароитида Қуролли Кучлар салоҳиятини янада мустаҳкамлаш, халқ ва армия бирдамлигини кучайтириш ҳамда ёшларни ватанпарварлик руҳида тарбиялаш муҳимлигини таъкидлади.
