Президент Шавкат Мирзиёев мамлакатда туризм, транспорт ва ижтимоий инфратузилмани ривожлантиришга қаратилган истиқболли қурилиш лойиҳалари тақдимоти билан танишди. Иқтисодий ўсиш суръатлари ва халқаро ҳамкорликнинг кенгайиши Ўзбекистонда замонавий инфратузилмани жадал ривожлантиришни талаб қилаётгани таъкидланди.
Тақдимотда Хива шаҳрида Конгресс маркази ва тарихий-этнографик боғ барпо этиш режалари кўриб чиқилди. Ушбу мажмуалар халқаро анжуманлар ўтказиш ҳамда туристлар оқимини оширишга хизмат қилиши қайд этилди. Шунингдек, Конфуций институти ва Лу Бан устахонасини ташкил этиш орқали маданий-маърифий тадбирлар ва касб-ҳунар таълимини ривожлантириш кўзда тутилган.
Урганч халқаро аэропортини модернизация қилиш, йўловчи ва юк ташиш хизматларини яхшилаш, логистика имкониятларини кенгайтириш режалари ҳам муҳокама қилинди. Бундан ташқари, Урганч вокзалидан аэропортгача алоҳида темирйўл линияси тортиш ва Урганч–Хива автомобиль йўлини реконструкция қилиш ҳамда муқобил янги йўл қуриш таклиф этилди.
Фарғона шаҳрида замонавий экспомарказ қуриш лойиҳаси ҳудуднинг инвестициявий жозибадорлигини оширишга хизмат қилиши қайд этилди. Шунингдек, Бурхониддин Марғилоний илмий-тадқиқот марказини ташкил этиш ва Бухоро давлат университети учун янги кампус барпо этиш бўйича таклифлар тақдим этилди.
Тошкент шаҳрида замонавий бадиий гимнастика мажмуаси қуриш лойиҳаси ҳам муҳокама қилиниб, у ёшлар салоҳиятини ривожлантириш ва профессионал спортчилар тайёрлашга қаратилиши таъкидланди.
Давлат раҳбари лойиҳаларни амалга оширишда сифат, қулайлик ва замонавий шаҳарсозлик талаблари устувор бўлиши, шунингдек, аҳоли эҳтиёжларини инобатга олиш зарурлигини таъкидлаб, мутасаддиларга тегишли топшириқлар берд
