Ташкилий меҳнат миграцияси географиясини кенгайтириш, айниқса Европа ва Яқин Шарқ давлатлари билан ҳамкорликни кучайтириш зарурлиги таъкидланди.
Маълум қилинишича, илгари ўзбекистонликлар асосан 2–3 та давлатда меҳнат қилган бўлса, ҳозир ташкилий миграция асосида 30 дан ортиқ мамлакатда ишламоқда. Германия, Япония ва Жанубий Корея компаниялари Ўзбекистонда ўқув курсларини ташкил этиб, мутахассислар тайёрлашни йўлга қўйган.
Хусусан, Япония компанияси қурилиш, ҳайдовчилик, меҳмонхона ва ресторан хизмати йўналишларида 10 минг нафар ўзбек мутахассисини жалб қилиш лойиҳасини бошлаган. Буюк Британияга мавсумий ишчилар юбориш амалиёти ҳам йўлга қўйилган.
Шу билан бирга, Австрия, Франция, Испания, Италия, Чехия ва Саудия Арабистонида ишчи кучига талаб юқори бўлишига қарамай, ушбу давлатлардаги элчиларнинг ташаббуслари етарли эмаслиги танқид қилинди. Элчиларга бу йўналишда ишларни фаоллаштириш вазифаси юклатилди.
