Шавкат Мирзиёев 21 январь куни сунъий интеллектдан фойдаланиш билан боғлиқ ҳуқуқий асосларни белгиловчи қонунни имзолади. Бу ҳақда Адлия вазирлиги ахборот хизмати хабар берди.
Ҳужжат билан “Ахборотлаштириш тўғрисида”ги қонунга ўзгартириш ва қўшимчалар киритилиб, сунъий интеллект технологияларидан фойдаланишнинг умумий асослари ҳамда ушбу соҳада ваколатли давлат органининг ваколатлари белгиланди.
Унда сунъий интеллект инсон билим ва кўникмаларига тақлид қилувчи, мустақил ўрганиш ҳамда аниқ вазифаларни бажаришда инсон ақлий фаолиятига яқин натижалар бера оладиган технологик ечимлар мажмуи сифатида таърифланган.
Қонунга кўра, инсоннинг ҳуқуқ ва эркинликларига дахлдор, юридик аҳамиятга эга қарорлар қабул қилишда фақат сунъий интеллектга асосланган ахборот тизимлари хулосаларига таяниш тақиқланади. Бундай қарорлар қабул қилишда инсон омили мажбурий бўлиши керак.
Шунингдек, сунъий интеллект технологияларидан фойдаланган ҳолда шахсга доир маълумотларга қонунга хилоф равишда ишлов бериш, уларни оммавий ахборот воситалари, телекоммуникация тармоқлари ёки интернет орқали тарқатиш учун маъмурий жавобгарлик белгиланди.
Хусусан, ҳуқуқбузарлик содир этиш воситалари мусодара қилиниб, базавий ҳисоблаш миқдорининг 50 бараваридан 100 бараваригача — 20,6 млн сўмдан 41,2 млн сўмгача жарима солиниши назарда тутилган. Қонун расмий эълон қилинган кундан эътиборан кучга киради.
