Давос шаҳрига амалий ташриф доирасида Шавкат Мирзиёев "BlackRock" компанияси директорлар кенгаши аъзоси ва катта бошқарувчи директори Адебаё Огунлеси билан учрашди.
Учрашувда ушбу етакчи компания билан инвеститсиявий ҳамкорликнинг асосий йўналишлари ва аввал эришилган келишувларни амалга ошириш масалалари кўриб чиқилди. Шунингдек, "Blackrock" компаниясининг Ўзбекистондаги устувор лойиҳаларда иштирок этиш истиқболлари юзасидан фикр алмашилди.
Томонлар, шунингдек, компаниянинг Ўзбекистоннинг қатор корхоналари капиталига кириш, қўшма инвестициялар механизмларини шакллантириш, шунингдек, мамлакатнинг инвестиция муҳитини яхшилаш учун халқаро экспертизани жалб қилиш бўйича ташаббусларини қўллаб-қувватладилар.
Эслатиб ўтамиз, BlackRock активларни бошқариш бўйича дунёдаги энг йирик инвестиция компанияси ҳисобланади. У акциялар, облигациялар, кўчмас мулк ва инфратузилмага сармоя киритиш орқали давлатлар, пенсия жамғармалари, банклар ва хусусий инвесторларнинг триллионлаб долларларини бошқаради. BlackRock, шунингдек, бутун дунё бўйлаб молия институтлари фойдаланадиган Aladdin таҳлилий платформаси билан машҳур.
