Ўзбекистон футбол ассоциацияси биринчи витсе-президенти Равшан Эрматов 2026 йилги Жаҳон чемпионати арафасида Ўзбекистон миллий терма жамоаси Россия терма жамоасига қарши ўртоқлик учрашуви ўтказишни режалаштирмаётганини маълум қилди. Бу ҳақда у РИА Новости агентлигига берган интервьюсида айтиб ўтди.
Маълумки, Ўзбекистон терма жамоаси тарихда илк бор Жаҳон чемпионати йўлланмасини қўлга киритган. АҚШ, Канада ва Мексикада бўлиб ўтадиган мундиалда Фабио Каннаваро шогирдлари Португалия ҳамда Колумбияга қарши майдонга тушади. Гуруҳдаги учинчи рақиб қитъалараро плей-офф натижаларига кўра аниқланади.
Жаҳон чемпионати олдидан терма жамоа март ойида FIFA Сериэс доирасида икки ўртоқлик учрашуви ўтказади. Апрель ойидаги халқаро танаффус бўйича аниқ режалар ҳозирча эълон қилинмаган. Май ойида Суперлига етакчиларига қарши назорат баҳслари режалаштирилган бўлса, июнь ойида Канада терма жамоасига қарши ўртоқлик учрашуви ўтказилиши кутилмоқда.
Эслатиб ўтамиз, Ўзбекистон ва Россия терма жамоалари шу кунгача бир марта — 2022 йил ноябрь ойида Тошкентда ўзаро баҳс олиб борган ва учрашув 0:0 ҳисобида якунланган.
