Қирғизистоннинг Талас вилоятида эркак хотинига бензин сепиб, уни ёқиб юборишга уринганликда гумонланиб қўлга олинди. Бу ҳақда Sputnik Қирғизистон вилояти полиция бошқармасига таяниб хабар берди.
Маълум қилинишича, 5 февраль куни 27 ёшли аёл полицияга мурожаат қилиб, 2025 йил 15 октябрь куни турмуш ўртоғи билан боғлиқ оғир зўравонлик ҳолати содир бўлганини билдирган. Унинг сўзларига кўра, эркак сабабсиз жанжал кўтариб, уни уйдан ҳайдаб чиқарган ва кейин бензин сепиб, ёқиб юборишга ҳаракат қилган.
Полиция маълумотларига кўра, ўша йил октябрь ойида ички ишлар органларига тураржойда ёнғин чиққанлиги ҳақида хабар келиб тушган. Ҳодиса ёнғинлар журналига қайд этилган, гувоҳлар сўроқ қилинган. Дастлаб ёнғин печкани ёқиш вақтида бензин ишлатилгани сабаб келиб чиққан, деб баҳоланган. Оқибатда эр-хотин иккаласи ҳам куйиш жароҳати олиб, реанимация бўлимига ётқизилган. Уларнинг аҳволи оғир бўлгани учун ўша пайтда сўроқ ўтказиш имкони бўлмаган.
Аёлнинг айтишича, ҳодисадан кейин у узоқ вақт қариндошларига ҳам, ҳуқуқни муҳофаза қилувчи идораларга ҳам мурожаат қилмаган.
Такрорий аризадан сўнг Жиноят кодексининг 130-моддаси (оғир тан жароҳати етказиш) билан жиноят иши қўзғатилиб, гумонланувчи қўлга олинган ва вақтинчалик сақлаш ҳибсхонасига жойлаштирилган.
