Андижон вилоятида ўтказилган тадбирда Хўжаобод тумани ҳудудида тўхтатилган “БЙД” русумли автомобиль салонидан 5 кг 946 гр “Мефедрон” синтетик гиёҳвандлик воситаси аниқланди. Маълум бўлишича, муқаддам судланган шахс ушбу моддани наркокурерлар томонидан “закладка” тарзида қолдирилган жойдан олиб, Тошкент шаҳрига етказиб беришни режалаштирган.
Пойтахтда ўтказилган яна бир тезкор тадбирда хориждан курьерлик жўнатмаси орқали қандолат маҳсулотлари орасига яширилган 350 гр “Клефедрон” моддасини қабул қилиб олган шахс ушланди. Давом этган тадбирда унинг шериги ҳам қўлга олиниб, яшаш хонадонида ташкил этилган нарколабораториядан 5,3 кг атрофида синтетик гиёҳванд моддалар, гашиш ва марихуана мойларига ўхшаш моддалар, шунингдек лаборатория жиҳозлари ашёвий далил сифатида олинди.
Наманганда ўтказилган тезкор тадбирда эса Қирғиз Республикасидан ноқонуний олиб ўтилган 1 кг 23 гр “героин”ни 18,5 минг долларга сотиш вақтида шахс қўлга олинди.
Сирдарё вилоятида тўхтатилган “Cобалт” автомобилидан эса 2516 дона “Регапен” номли кучли таъсир қилувчи дори воситалари аниқланди. Уларнинг Қўқон шаҳрида “закладка” тарзида қолдирилган жойдан олингани маълум қилинди.
Барча ҳолатлар юзасидан жиноят ишлари қўзғатилиб, тергов ҳаракатлари олиб борилмоқда.
