Ўзбекистон миллий терма жамоаси жаҳон чемпионатига тайёргарлик доирасида Канадага қарши ўртоқлик учрашувида майдонга тушди. Эдмонтон шаҳрида бўлиб ўтган баҳсда мезбонлар 2:0 ҳисобида ғалаба қозонди.
Ўзбекистон миллий терма жамоаси жаҳон чемпионатига тайёргарлик жараёнида Канадага қарши ўртоқлик учрашуви ўтказди. Эдмонтон шаҳридаги “Commonwealth” стадионида бўлиб ўтган баҳсда Канада терма жамоаси 2:0 ҳисобида устун келди.
Учрашувнинг биринчи бўлими асосан тенг курашлар остида ўтди. Ҳар икки жамоа рақиб жарима майдончаси атрофида хавфли вазиятлар яратишга ҳаракат қилди. Ўйиннинг 24-дақиқасида Азиз Ғаниев жароҳат олиб, майдонни тарк этишга мажбур бўлди. Унинг ўрнига Аббосбек Файзуллаев майдонга туширилди.
Танаффусдан кейин Канада терма жамоаси мураббийлар штаби таркибда еттита ўзгаришни амалга оширди. Бу қарор ўз самарасини бериб, 58-дақиқада мезбонлар ҳисобни очди. Ўзбекистонлик футболчилар ҳужумга ўтаётган пайтда тўпни йўқотиб қўйди ва рақиб тезкор қарши ҳужум уюштирди. Натижада иккинчи бўлимда захирадан майдонга тушган Жонатан Осорио Абдувоҳид Неъматов қўриқлаётган дарвозани ишғол қилди.
Ўйиннинг сўнгги дақиқаларида Канада устунликни мустаҳкамлади. 90+1-дақиқада Жейдон Нелсон жамоасининг иккинчи голига муаллифлик қилди.
Шу тариқа, Ўзбекистон терма жамоаси жаҳон чемпионати олдидан ўтказилган навбатдаги ўртоқлик учрашувини мағлубият билан якунлади.
Ўртоқлик учрашуви
Канада — Ўзбекистон 2:0
Голлар: Осорио (58), Нелсон (90+1).
