Мураббийнинг айтишича, ўртоқлик ўйинлари жамоа хатоларини аниқлаш ва улар устида ишлаш учун муҳим имконият ҳисобланади.
“Ҳар қандай ўйинда хатолар бўлади. Муҳими, бундай камчиликларни расмий учрашувларда эмас, айнан ўртоқлик ўйинларида тузатишдир”, — деди у.
Каннаваро биринчи бўлимда жамоа ўйинидан қониққанини, футболчилар ихчам ва агрессив ҳаракат қилганини таъкидлади. Унинг сўзларига кўра, иккинчи бўлимда интенсивлик пасайгани оқибатида айрим хатоларга йўл қўйилган.
Мураббий Канада терма жамоасининг сўнгги йилларда сезиларли даражада ривожланганини ҳам қайд этди.
Шунингдек, у Жаҳон чемпионатидаги рақиблар — Португалия, Колумбия ва Конго каби жамоалар кучли эканини айтиб, футболчиларни бу мусобақада иштирок этишдан завқ олишга чақирди.
“Бу Ўзбекистон тарихидаги илк Жаҳон чемпионати. Футболчиларга айтадиган гапим битта — бундан завқланинг”, — деди Каннаваро.
Мураббий Абдуқодир Ҳусанов ўйинига ҳам тўхталиб, уни истиқболли ва кучли ҳимоячи сифатида баҳолади.
