Сурхондарё вилоятининг Термиз шаҳрида жойлашган банк хизматлари офисига қарашли 3 та банкоматда ёнғин содир бўлди. Бу ҳақда вилоят Фавқулодда вазиятлар бошқармаси хабар берди.
Қайд этилишича, бугун, 2 июнь куни соат 04:14 да 112 тизими орқали Термиз шаҳри “Дўстлик” маҳалла фуқаролар йиғини ҳудудида жойлашган Бизнесни ривожлантириш банки Термиз банк хизматлари офисига қарашли банкоматларда ёнғин юзага келгани ҳақида хабар келиб тушган.
Шундан сўнг ёнғин жойига 1-қутқарув бўлинмасидан 1 та экипаж соат 04:19 да етиб борган. Ёнғин соат 04:20 да қуршаб олиниб, 04:28 да тўлиқ бартараф этилган.
Ҳодиса оқибатида тан жароҳати олганлар қайд этилмаган.
Ҳозирда ёнғиннинг келиб чиқиш сабаблари ҳамда етказилган моддий зарар миқдори аниқланмоқда.
