Ўзбекистон миллий терма жамоаси ва Англиянинг “Манчестер Сити” клуби ҳимоячиси Абдуқодир Хусановнинг трансфер қиймати 50 миллион еврога етди.
Бу ҳақда Transfermarkt портали Англия Премьер-лигаси футболчиларининг бозор қийматларини янгилаганидан сўнг маълум қилди.
Янгиланган маълумотларга кўра, 22 ёшли футболчининг трансфер баҳоси 15 миллион еврога ошган. Бунгача унинг бозор қиймати 35 миллион евро этиб баҳоланган эди.
Натижада Хусанов Осиёнинг энг қиммат футболчисига айланди. У бу борада япониялик футболчилар Каишу Сано ва Такефуса Кубодан ўзиб кетди.
Шунингдек, ўзбекистонлик ҳимоячи Англия Премьер-лигасида тўп сураётган собиқ СССР мамлакатлари футболчилари орасида ҳам энг юқори трансфер қийматига эга ўйинчи сифатида қайд этилди.






