Хусусан, Бухоро вилоятининг Шофиркон туманида 2001 ва 2005 йилларда туғилган икки нафар фуқаро 110 грамм соф оғирликдаги ностандарт олтин қуймасини 17 минг АҚШ долларига сотаётган вақтида қўлга олинди. Кейинги текширувларда олтинни қотишма шаклига келтириш учун мўлжалланган ускуналар, прекурсорлар ҳамда газ баллонлари ҳам аниқланган. Экспертизага кўра, ушбу қуйманинг қиймати 209 миллион сўмдан ортиқни ташкил этган.
Яна бир ҳолатда Тошкент халқаро аэропортида хориждан келган фуқаро шахсий тинтувдан ўтказилиб, у оёқлари остига яширилган ҳолда олиб ўтилган, умумий қиймати қарийб 290 миллион сўмлик 226 грамм тилла буюмлар билан ушланган.
Шунингдек, Андижон вилоятида ҳам шунга ўхшаш ҳолат қайд этилди. Андижон шаҳрида яшовчи фуқаро “Дўстлик” халқаро назорат ўтказиш пункти орқали кириб келаётганда текширилиб, декларация қилинмаган, тахминан 400 миллион сўмлик 241 грамм тилла буюмлар борлиги аниқланган. Ушбу маҳсулотлар Туркиядан Қирғиз Республикаси орқали олиб келинаётгани маълум бўлган.
Ҳозирда барча ҳолатлар юзасидан жиноят ишлари қўзғатилиб, тергов ҳаракатлари олиб борилмоқда.
