Бугун, 4 июнь куни Ерда кучли магнит бўрони кузатилиши эҳтимоли бор. Бу ҳақда Россия Фанлар академиясининг Қуёш астрономияси лабораторияси маълум қилди.
Қайд этилишича, Қуёшда содир бўлган кучли Х синфидаги чақнашлар натижасида ҳосил бўлган плазма оқими Ер ионосферасига етиб келиши кутилмоқда. Мутахассислар прогнозига кўра, геомагнит фаоллик даражаси 6–7 баллгача кўтарилиши мумкин.
Олимларнинг таъкидлашича, плазма оқимининг Ер магнит майдони билан ўзаро таъсири баъзи инсонларда саломатлик билан боғлиқ ноқулайликларни келтириб чиқариши эҳтимолдан холи эмас. Хусусан, уйқу сифати ёмонлашиши, тез чарчаш ҳолатлари ҳамда юрак уриши ритмида ўзгаришлар кузатилиши мумкин.
Шу муносабат билан мутахассислар аҳолига саломатлигига эътиборли бўлишни, имкони борича ортиқча жисмоний зўриқишлардан ва кучли руҳий босимдан сақланишни тавсия қилмоқда.
Маълумот учун, магнит бўронлари Қуёшдаги юқори фаоллик оқибатида юзага келадиган геомагнит ҳодиса бўлиб, улар алоқа тизимлари, навигация воситалари ҳамда айрим инсонларнинг умумий ҳолатига таъсир кўрсатиши мумкин.
