Сурхондарё вилоятининг Денов туманида қарздорлардан берилган маблағдан бир неча баравар кўп пул талаб қилган шахслар қўлга олинди. Бу ҳақда Ички ишлар вазирлиги маълум қилди.
Қайд этилишича, 1986 йилда туғилган икки нафар аёл Денов тумани Ички ишлар бўлимига мурожаат қилиб, бир аёл улардан қарз эвазига асоссиз равишда катта миқдорда пул талаб қилаётганини билдирган.
Аниқланишича, гумонланувчи биринчи ҳолатда 45 миллион сўм қарз учун 128 миллион сўм, иккинчи ҳолатда эса 50 миллион сўм қарз эвазига 140 миллион сўм қайтаришни талаб қилган.
Шунингдек, қарзни ундириш мақсадида жалб қилинган эркак жабрланувчиларга нисбатан таҳдид ва тазйиқ ўтказиб, маблағни бермаган тақдирда уларнинг ҳаётига хавф туғдиришини айтган.
Мурожаатлар асосида жорий йилнинг 15 май куни Денов туманида тезкор тадбир ўтказилган. Унда гумонланувчилар талаб қилинган пул маблағларини олаётган вақтида ашёвий далиллар билан ушланган.
Мазкур ҳолат юзасидан Денов тумани Ички ишлар бўлими ҳузуридаги Тергов бўлими томонидан Жиноят кодексининг 165-моддаси биринчи қисми билан жиноят иши қўзғатилган.
Айни вақтда ҳолат юзасидан дастлабки тергов ҳаракатлари олиб борилмоқда.
