Ўзбекистонда жорий йилнинг январь–май ойларида наркотик моддалар савдоси билан шуғулланган 59 та йирик уюшган жиноий гуруҳ фаолиятига чек қўйилди. Бу ҳақда ҳуқуқни муҳофаза қилувчи органлар маълум қилди.
Қайд этилишича, ҳуқуқ-тартибот идоралари тезкор бўлинмалари ҳамкорлигида уюшган наркожиноятчилик ва жиноий гуруҳларга қарши қатор махсус тадбирлар ўтказилган.
Натижада 59 та йирик наркогуруҳ фаолияти тўхтатилиб, уларнинг 15 нафар етакчиси ва 199 нафар аъзоси қўлга олинган. Шунингдек, 15 та яширин нарколаборатория фош этилган. Бу кўрсаткич ўтган йил давомида аниқланган нарколабораториялар сонидан ҳам юқори экани қайд этилмоқда.
Тезкор тадбирлар давомида 1,2 тонна анъанавий наркотик воситалар, 54 килограмм синтетик наркотиклар, 4,6 миллион дона психотроп дори воситалари ҳамда 3 тоннадан ортиқ прекурсорлар мусодара қилинган.
Маълум қилинишича, мазкур жиноий тармоқлар фаолиятининг тўхтатилиши аҳоли орасида тарқатилиши мумкин бўлган миллионлаб психотроп воситалар ва катта ҳажмдаги наркотик моддаларнинг ноқонуний айланмаси олдини олган.
Шунингдек, Қозоғистон, Тожикистон ва Қирғизистоннинг ваколатли идоралари билан ҳамкорликда наркожиноятчиликка қарши қаратилган еттита халқаро тезкор тадбир ўтказилган.
Таҳлилларга кўра, наркотик воситаларнинг ноқонуний айланмаси қисқариб, уларни сотиш мураккаблашгани сабабли «қора бозор»даги нархлар ҳам сезиларли даражада ошган.
Уюшган жиноятчиликка қарши кураш доирасида эса 40 та йирик жиноий гуруҳ фаолиятига барҳам берилган. Уларнинг 48 нафар етакчиси, жумладан, олти нафари хорижий давлатларда ушланиб, Ўзбекистонга экстрадиция қилинган. Шунингдек, 224 нафар аъзо қўлга олинган.
Қайд этилишича, мазкур жиноий гуруҳлар мамлакатнинг 50 та шаҳар ва туманида талончилик, товламачилик, безорилик, тадбиркорлик фаолиятига тўсқинлик қилиш ҳамда фуқароларга тан жароҳати етказиш каби оғир ва ўта оғир жиноятларни содир этиб келган.
