Transparency International халқаро ташкилоти коррупцияни қабул қилиш индекси (Corruption Perceptions Index — CPI) бўйича навбатдаги ҳисоботини эълон қилди. Унга кўра, Ўзбекистон 31 балл билан 180 давлат орасида 124-ўринни қайд этди.
Мазкур индекс давлат секторидаги коррупция даражасини баҳолайди ҳамда мамлакатларни 0 дан 100 баллгача бўлган шкала асосида рейтинг қилади. Бунда 0 балл коррупция даражаси ўта юқори эканини, 100 балл эса давлат сектори деярли коррупциядан холи эканини англатади.
Ҳисоботга кўра, Марказий Осиё давлатлари орасида энг яхши натижани Қозоғистон қайд этган. Мамлакат 38 балл билан 96-ўриндан жой олган.
Қирғизистон 26 балл билан 142-ўринни, Тожикистон 19 балл билан 166-ўринни эгаллаган. Минтақадаги энг паст кўрсаткич эса Туркманистон ҳиссасига тўғри келиб, мамлакат 17 балл билан 167-ўринда қайд этилган.
Transparency International маълумотларига кўра, жаҳон бўйича ўртача кўрсаткич 42 баллни ташкил этган. Шу билан бирга, рейтингдан ўрин олган давлатларнинг учдан икки қисмидан кўпроғи мазкур кўрсаткичдан паст натижа қайд этган.
Рейтингнинг юқори поғоналаридан Дания, Финляндия ва Сингапур жой олган. Дания 89 балл билан биринчи ўринни сақлаб қолган бўлса, Финляндия 88 балл билан иккинчи, Сингапур эса 84 балл билан учинчи ўринни эгаллаган.
Шунингдек, Янги Зеландия ва Норвегия 81 баллдан, Швеция эса 80 балл билан энг кам коррупция кузатиладиган давлатлар қаторидан ўрин олган.
Рейтингнинг энг қуйи қисмида эса узоқ йиллардан буён сиёсий беқарорлик ва қуролли можаролар таъсирида қолаётган давлатлар қайд этилган. Хусусан, Жанубий Судан 9 балл билан энг паст натижани кўрсатган.
Экспертлар суд ҳокимияти мустақиллигининг етарли даражада таъминланмагани, давлат институтлари фаолиятида очиқликнинг камлиги ҳамда демократик механизмларнинг заифлиги коррупция даражаси юқори бўлиб қолаётганининг асосий омилларидан бири эканини таъкидламоқда.
