“Transfermarkt” портали Испания Ла Лигаси футболчилари бозор қийматларининг навбатдаги янгиланишини эълон қилди. Унга кўра, Мадриднинг “Реал” клуби ҳамда Франция терма жамоаси ҳужумчиси Килиан Мбаппенинг трансфер қиймати 20 миллион еврога камайган.
Янгиланган баҳолаш натижаларига кўра, 27 ёшли футболчининг бозор қиймати 180 миллион еврони ташкил этмоқда. Аввал у 200 миллион евро деб баҳоланган эди.
Қайд этилишича, қийматнинг пасайишига қарамай, Мбаппе ўтган мавсумни самарали ўтказган. У барча мусобақалар доирасида 44 та учрашувда майдонга тушиб, 42 та гол урган ҳамда 7 та голли узатмани амалга оширган. Шу билан бирга, у мавсумнинг энг яхши тўпурари сифатида қайд этилган.
Эслатиб ўтамиз, аввалроқ португалиялик футбол юлдузи Криштиану Роналдунинг ҳам трансфер қиймати 12 миллион евродан 10 миллион еврога туширилган эди.
