Аргентина миллий терма жамоаси футболчилари 2026 йилги Жаҳон чемпионати ярим финалида Англия устидан қозонилган 2:1 ҳисобидаги ғалабадан сўнг майдонда Мальвина (Фолкленд) оролларига оид сиёсий мазмундаги баннерни намойиш қилди. Бу ҳақда The Telegraph хабар берди.
Нашр маълумотига кўра, учрашув тугагач, аргентиналик футболчилар «Мальвина ороллари Аргентинага тегишли» деган ёзув туширилган баннерни очган.
Фолкленд ороллари, Аргентинада Мальвина ороллари деб аталадиган архипелаг, узоқ йиллардан буён Лондон ва Буэнос-Айрес ўртасидаги ҳудудий баҳс мавзуси ҳисобланади. 1982 йилда икки давлат мазкур ороллар учун қуролли можарога киришган. Уруш давомида 649 нафар аргентиналик ва 255 нафар британиялик ҳарбий ҳалок бўлган. Низо якунларига кўра, архипелаг устидан назорат Буюк Британия қўлида сақланиб қолган.
2013 йилда оролларда ўтказилган референдумда овоз берганларнинг қарийб барчаси Буюк Британия таркибида қолиш тарафдори бўлган. Бироқ Аргентина ҳукумати мазкур овоз бериш натижаларини тан олмайди.
Хабар қилинишича, ярим финал учрашуви олдидан АҚШ Федерал қидирув бюроси (FBI), FIFA ҳамда маҳаллий ҳуқуқни муҳофаза қилувчи органлар вакиллари хавфсизлик бўйича қўшма йиғилиш ўтказган. Англия ва Аргентина ўртасидаги тарихий рақобат ҳамда мухлислар ўртасида эҳтимолий тўқнашувлар хавфи инобатга олиниб, баҳс «энг юқори хавф» тоифасига киритилган эди.
Эслатиб ўтамиз, Аргентина 19 июль куни бўлиб ўтадиган Жаҳон чемпионати финалида Испания терма жамоасига қарши майдонга тушади.
