Ўзбекистонлик гроссмейстер Жавоҳир Синдоров ҳамда қозоғистонлик шахматчи Бибисара Асаубаева “Формула-1” бўйича Монако Гран-присига ташриф буюрди. Бу ҳақда Асаубаева ўзининг Telegram-каналида маълум қилди.
Қайд этилишича, 22 ёшли Бибисара Асаубаева яқинда Норвегиянинг Осло шаҳрида ўтказилган нуфузли шахмат турнирида ғолиб чиқиб, мусобақа тарихидаги энг ёш чемпионга айланган. Шундан сўнг у Жавоҳир Синдоров билан бирга Монте-Карлога йўл олган.
Асаубаева ижтимоий тармоқда Монако шаҳри ва пойга трассасидан олинган суратлар билан ўртоқлашган. Унинг маълум қилишича, у мусобақа трассаси бўйлаб велосипедда сайр қилиш имконига эга бўлган ва пойгада VIP меҳмон сифатида қатнашган.
“Мен “Формула-1” пойгасининг сўнгги кунида иштирок этдим. Бу жуда қизиқарли бўлди. Шунингдек, Дональд Трампнинг ўғли каби кўплаб машҳур инсонларни ҳам кўрдим”, деб ёзган Асаубаева.
Айни вақтда ижтимоий тармоқларда Бибисара Асаубаева ва Жавоҳир Синдоров ўртасида яқин муносабатлар борлиги ҳақида турли тахминлар билдирилмоқда. Бироқ шахматчиларнинг ўзи бу ҳақда ҳеч қандай расмий баёнот бермаган.
Маълумот учун, Жавоҳир Синдоров йил охирида жаҳон шахмат тожи учун курашадиган номзодлар турнири иштирокчиларидан бири ҳисобланади. У Норвегиядаги мусобақада қатнашмаган бўлса-да, Асаубаевани қўллаб-қувватлаш мақсадида Ослога боргани ҳақида хабарлар тарқалган эди.
