АҚШ Давлат департаменти хорижликлар учун бизнес ва сайёҳлик визаларини расмийлаштириш жараёнини тезлаштиришга қаратилган янги «премиум» хизматни синов тариқасида йўлга қўйишни режалаштирмоқда. Бу ҳақда Associated Press хабар берди.
Маълум қилинишича, янги дастур доирасида ариза берувчилар амалдаги консуллик йиғимидан ташқари яна 750 доллар тўлаш орқали виза суҳбати санасини тезроқ белгилаш имкониятига эга бўлади.
Қайд этилишича, пилот лойиҳа 2026 йил 1 июлдан 31 декабрга қадар амал қилади. Хизматдан фойдаланган фуқаролар АҚШнинг танланган элчихона ва консуллик муассасаларида тўлов амалга оширилган кундан бошлаб ўн кун ичида суҳбат вақтига ёзилиши мумкин бўлади.
Шу билан бирга, мазкур қўшимча тўлов виза берилишини кафолатламайди. Виза олиш ёки рад этиш тўғрисидаги қарор амалдаги тартиб асосида қабул қилинади.
Ҳозирда АҚШга бизнес ва сайёҳлик визаси учун белгиланган мажбурий консуллик йиғими 185 долларни ташкил этади. Янги хизмат жорий этилса, ариза берувчиларнинг умумий харажати қарийб беш бараварга ошади.
Associated Press маълумотига кўра, тезлаштирилган хизмат кўрсатиладиган элчихона ва консулликлар рўйхати 1 июлга қадар эълон қилинади. Лойиҳа дастлаб синов тариқасида амалга оширилади ва унга талаб юқори бўлган тақдирда муддати узайтирилиши мумкин.
Сўнгги йилларда АҚШнинг миграция сиёсати қатъийлашгани ортидан виза расмийлаштириш жараёнлари ҳам мураккаблашди. Айрим давлатлар фуқаролари учун қўшимча текширувлар жорий этилган бўлиб, ариза берувчиларнинг ижтимоий тармоқлардаги фаолияти ҳам ўрганилмоқда. Бу эса кўплаб мамлакатларда виза суҳбатлари учун навбатларнинг бир неча ойга чўзилишига сабаб бўлган.
