Москва вилоятининг Балашиха шаҳрида автомобилга ўрнатилган портловчи қурилманинг ишга тушиши оқибатида бир киши ҳалок бўлди. Россия ҳуқуқ-тартибот идоралари қурбон шахсини расман очиқламаган бўлса-да, бир қатор манбалар уни Россия Мудофаа вазирлиги Бош ракета-артиллерия бошқармаси раҳбари Дамир Давидов деб атади.
Ҳодиса 9 июн куни маҳаллий вақт билан соат 05:30 атрофида Балашиханинг Авиаторлар микрорайонидаги Колдунов кўчасида содир бўлган. BMW X3 русумли автомобил автотураргоҳдан чиқиб кетаётган пайтда портлаган. Ҳайдовчи воқеа жойида ҳалок бўлган.
Москва вилояти Тергов қўмитаси ва прокуратураси портлаш фактини тасдиқлади. Ҳодиса юзасидан жиноий иш қўзғатилгани маълум қилинган, бироқ тергов қайси модда бўйича олиб борилаётганига аниқлик киритилмаган.
Марҳумнинг шахси ҳақидаги дастлабки маълумотни «ВЧК-ОГПУ» телеграм-канали тарқатди. Каналга кўра, ҳалок бўлган шахс генерал-лейтенант Дамир Давидов бўлган. Кейинчалик бу маълумотни Украина томонидаги бир қатор манбалар, жумладан, Сергей Стерненко ҳамда Insider UA нашри ҳам келтирди.
Astra телеграм-канали манбасига кўра, автомобил остига қўлбола портловчи қурилма ўрнатилган бўлган. «Коммерсант» нашри эса унинг қуввати тротил эквивалентида тахминан 500 граммни ташкил этганини ёзди.
Очиқ манбалардаги маълумотларга кўра, Дамир Давидов Россия Мудофаа вазирлиги тизимида узоқ йиллар хизмат қилган. У ҳақидаги маълумотлар орасида 2009 йилда Мудофаа вазирлигининг «Красная звезда» нашрида эълон қилинган мақола ҳам бор. Унда Давидов Марказий синов техник бюроси командири сифатида тилга олинган. 2019 йилда эса у Россия ҳарбий делегацияси таркибида Қозоғистонга ташриф буюргани ҳақида хабарлар чиққан.
Эътиборлиси, ҳодиса содир бўлган Авиаторлар микрорайонида бу каби ҳолат илк бор кузатилаётгани йўқ. 2025 йил апрель ойида ҳам шу ҳудудда Россия Қуролли кучлари Бош штаби Бош оператив бошқармаси бошлиғи ўринбосари Ярослав Москаликнинг автомобили портлатилган эди. Ўшанда Россия Тергов қўмитаси мазкур ҳолатни теракт сифатида баҳолаб, уни Украина махсус хизматлари билан боғлаганди.
