Ўзбекистон миллий терма жамоаси бош мураббийи Фабио Каннаваро 2026 йилда АҚШ, Канада ва Мексика мезбонлик қиладиган FIFA Жаҳон чемпионати иштирокчилари орасида энг юқори маош олувчи мураббийлар бешлигига кирди.
Finance Football нашри томонидан эълон қилинган рейтингга кўра, италиялик мутахассиснинг йиллик маоши тахминан 4 миллион еврога тенг. У мазкур кўрсаткич бўйича Португалия миллий терма жамоаси бош мураббийи Роберто Мартинес билан биргаликда бешинчи ўринни эгаллаган.
Рейтингда биринчи ўрин Бразилия терма жамоаси устози Карло Анчелоттига насиб этган. Италиялик тажрибали мураббийнинг йиллик маоши 10 миллион еврони ташкил этади.
Иккинчи поғонадан Германия миллий жамоаси бош мураббийи Юлиан Нагелсманн жой олган бўлиб, унинг йиллик даромади 7 миллион евро этиб баҳоланган. Учинчи ўринда эса АҚШ терма жамоаси устози Маурисио Почеттино қайд этилган. Аргентиналик мутахассис йилига 6 миллион евро маош олади.
Тўртинчи ўрин Англия миллий терма жамоаси бош мураббийи Томас Тухел ҳиссасига тўғри келган. Немис мутахассисининг йиллик маоши 5,8 миллион еврони ташкил қилади.
Шунингдек, энг кўп ҳақ тўланадиган мураббийлар ўнталигига Франция терма жамоаси бош мураббийи Дидье Дешам, Нидерландия устози Роналд Куман, Уругвай терма жамоаси мураббийи Марсело Бьелса, Канада миллий жамоаси раҳбари Жесси Марш, Мексика терма жамоаси бош мураббийи Хавьер Агирре ҳамда Парагвай устози Густаво Алфаро ҳам киритилган.
Маълумот учун, 2026 йилги FIFA Жаҳон чемпионати 11 июндан 19 июлга қадар АҚШ, Канада ва Мексикада бўлиб ўтади. Турнир тарихида илк бор мундиалда 48 та миллий терма жамоа иштирок этади.
