Таиланд суди 2015 йилда Бангкок марказида содир этилган ва 20 кишининг ҳаётига зомин бўлган портлаш иши бўйича икки нафар уйғур миллатига мансуб шахсни ўлим жазосига ҳукм қилди. Бу ҳақда Reuters агентлиги суд баёнотига таяниб хабар берди.
Маълум қилинишича, ҳукм бугун, 11 июнь куни Адем Қарадоғ ва Юсуф Миралига нисбатан чиқарилган. Портлаш Таиланд пойтахти марказида жойлашган машҳур Эраван зиёратгоҳи ҳудудида содир бўлган бўлиб, ҳодиса оқибатида 20 киши ҳалок бўлган, яна 120 киши турли даражада жароҳатланган. Қурбонлар орасида Хитойнинг беш нафар ва Гонконгнинг икки нафар фуқароси ҳам бўлган.
Суд ҳужжатларида қайд этилишича, айбланувчиларнинг ҳаракатлари бир нечта оғир жиноят таркибини ташкил қилган. Улар олдиндан режалаштирилган қотилликда айбдор деб топилган ва ушбу модда бўйича ўлим жазоси тайинланган.
Нашр маълумотига кўра, Адем Қарадоғ ва Юсуф Мирали тергов ва суд жараёнлари давомида ўзларига нисбатан қўйилган айбловларни рад этиб келган.
Уларнинг адвокати Чамроен Паномпакорн ҳукм устидан шикоят қилиниши ҳақида маълум қилди.
“Қўрқманглар, олдинда яна учта суд босқичи бор”, деди у журналистлар билан мулоқотда.
Ҳимоя томонининг яна бир вакили Чучат Канпай эса суд айрим муҳим далилларни инобатга олмаганини таъкидлаб, апелляция бериш муддатини узайтиришни сўрашини билдирди. Таиланд қонунчилигига кўра, ҳукм устидан бир ой ичида шикоят қилиш мумкин.
Мазкур иш бўйича суд жараёни ўн йилдан ортиқ вақт давом этди. Тергов давомида прокурорлар юзлаб гувоҳларни сўроқ қилган, шунингдек, гумонланувчилар учун муносиб таржимон топишда ҳам қийинчиликларга дуч келган.
Reuters қайд этишича, 2015 йилги теракт учун ҳеч бир ташкилот расман жавобгарликни ўз зиммасига олмаган. Бироқ хавфсизлик масалалари бўйича мутахассислар ҳужумни Таиланд томонидан ўша йилнинг июль ойида 100 дан ортиқ уйғурни Хитойга депортация қилиш қарорига жавоб сифатида баҳолаб келади.
Хитой эса Шинжон-Уйғур автоном районида диний ва маданий эркинликларни чеклаётгани ҳақидаги айбловлар сабаб халқаро майдонда мунтазам танқидларга учраб келмоқда.
Хитой Ташқи ишлар вазирлиги расмий вакили Линь Цзянь суд қарорини қўллаб-қувватлашини билдирган.
“Жиноятчилар ўта шафқатсиз ҳаракат қилган ва ўта оғир жиноят содир этган”, деди у.
Маълумот учун, ўтган йили Таиланд яна 40 нафар уйғурни Хитойга депортация қилган эди. Бу қарор БМТ инсон ҳуқуқлари бўйича экспертларининг чақириқларига қарамай қабул қилинган. Халқаро экспертлар мазкур шахслар Хитойга қайтарилган тақдирда қийноқлар, шафқатсиз муносабат ва бошқа жиддий хавф-хатарларга дуч келиши мумкинлигидан огоҳлантирган.
